«

»

এই লেখাটি 582 বার পড়া হয়েছে

Print this প্রকাশনা

সবন- হেগার চাঙমা কবিতে

সবন- সিয়্যান দ’ নিজ’ মন: যিয়্যান পরানে কয় সিয়্যান দেঘা যায়;

মনে কলে উরি পারে অজল আগজ’ উরেত্তে বার্গীসান,
গেই পারে কোগিল’ সুরে চিদদিঘোলী গান
মনর সুঘে খুয়েয় দি’ পারে বান্যে পরানর পরান,
পরান’ গীদ খুয়েয় দি’ পারে ভাঙি ফেলেলে বান্ন্যে দুয়োরান।
পরানেকলে উল্লে পারে আহ্‌জি যিয়্যে বিজগ’ খবং,
ফেলে এইচ্চ্যে চিগোন’ দিনর সুর
মুর স্ববনান বিজেরে চেলে ধরি পায় নিজ’ মন’ থুর।

চিগোন’ দিনুন যেন অডক ভরন বদা:
সবন’ দেঘান, ভাবান- মজুঙে দিনর কধা
কেউ ওই পারন মুজুঙ’দিনর বার্গী, কেউ অন ভুল,
কেউ অন বাদি কেউ অন লাম্বা চুল
আর একদাগি আগন জনম্মু থেয় যান চুন্দুল;
চুন্দুল মাঞ্জোর ভালেদ নেই, কোন কামত ন-যুগান
ভুলবডাসান তারাও পঝাবাচ; জাদর লৌ খেয় খেয় জাত্তুরে শুগান।

গাভুর’ অক্ত নয় মক্ত, গাভুর’ অক্ত ন-মানে গডা
দেঘিলে ব-কাম, শুনিলে ব-কধা গুজুরি উদে গাভুর’ বিরবিজ্জে তদা
পাত্থর খুনিখুনি ওদোরে উদে গাভুর’ গরম রক্ত-
আজেরে পরন সাগর’ বুগত একঝাঁক রাঙা তুবোল;
উজেবার ধারাজে গাভুর’ মনান হামেইয়্যে যুগোল,
গাভুর’ অক্ত রাঙাবই আহ্‌দত উজে যায় মিছিল’ রাজপধত্‌
সবনর পিত্থিমিয়ান দোল ওয় উদে পরিলে গাভুর’ জাদত্‌।
গাভুর’ অক্ত সবন’ অক্ত: গাভুর মাঞ্জো হিয়েত্তুন গাভুর-গাভুর ভাপ উড়ে
নুয়ো নুয়ো সবন দেঘন নুয়ো দিনোর গাভুজ্জে-গাভুরে,
এদুক্কেগরি কদক স্ববন মিঝি আগে হেংগরঙঅর সুরে, কবিতার তালে,
উভগীদত্‌; নেআলজি কদক রেদ আলেযিয়্যে গেঙ্ঘুল্ল্যের আদুলি পালাত্‌-
রাধামন-ধনপুদীর হিরবেঝরা লাঙে, শিবচরনর হানসুঘ গোজেন লামাত্‌,
তান্যেবী-কপুদী-চান্দোবীর আনাধগ পন পন চোঘপানি নালে- নুঞ্জোগুরি।

ইরুক গাভুর’ মাঞ্জো’ স্ববনানিও কেঞ্জান জানি জুর’ জুর’ লাগে;
স্ববনর-উ দ’ এক্কান বয়স আগে, সবন’ বয়স নয়-দ’ বঝরে,
মন’ মুজুঙে ফাগুন’ গাজ’ পাদাত্ তে ঘর গরে।
বয়জ’ নিয়মে একদিন বেগ’ মনত সবন জাগে;
জাগি উত্তে কড়া সবনানি একদিন পাগে, থে ঝুরি পরে
গাজ’আন্দলে পেগোসান ন’ ডগরে, তুম্বাস ন’ দে নাগে-নাগে
আর এদুক্কেগুরি বুড়ো অদে অদে আবাদাগুরি তে-উ একদিন লুদিক মাগে,
আবুজিবার চায় বুড়ো স্ববনর ধাগে বুড়ো মাঞ্জো ধগ তার-উ লাগে থগ।
হাঞ্জাবা হুরে গাভুর মাঞ্জো মনানি কিত্তেই এদক বুড়ো ?
– কান’ সান, বুব’ সান অলর গুরি থেদ’ চায় জুর’ জুর’,
আহ্‌দি ন-পারে আন্ধারে- নেই আগুন লুরো, জ্বলি উধি ন’ পারে,
হাঙেল উজু টিয়্যেয় ন’ পারে, আহ্‌দি যায় গুজং গুজং;
এদক ফাগুনেও কিত্তেই গাভুর’ মনে আগুন ন’ ঝরে?- মুই দ’ ন’ বুঝং।

জাগি উদিবার চেদন ছাড়া মন দ’ গাভুর নয়, -বুড়ো।

বাজি থেবার চেলে এক্কান-না-এক্কান স্ববন লাগে বাজিবার মত
মন লাগে সবন দেঘিবার মত, আগুন থা পরে সে মনত জ্বলি উধিবার মত:
গাভুর’ মন দ’ জ্বলি উধিবার চায়, কাউরেই তে ন’ দরায়,
সজাগে দোল দোল সবন দেঘিলে বেক্কুনোর চিদ জুরায়।

একদিন, একদিন না একদিন-
গাভুর’ কাবিল সবন’ ধার নাদি দিব’ পিত্থিমি বুগত যদক আন্ধার।

About the author

হেগা

Permanent link to this article: http://chtbd.org/archives/3013

2 comments

  1. sohel chakma

    অমহদ মনত পলঅ্ কবিতের হদানি।

  2. লেলিন চাঙমা

    অসাধারণ

মন্তব্য করুন

আপনার ই-মেইল এ্যাড্রেস প্রকাশিত হবে না। * চিহ্নিত বিষয়গুলো আবশ্যক।

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>