«

»

এই লেখাটি 989 বার পড়া হয়েছে

Print this প্রকাশনা

“ইদানিং কোচপানা মানে উজুরি যানা” ও অন্যান্য চাক্‌মা কবিতা

ইদানিং কোচপানা মানে উজুরি যানা

 

ইদানিং কোচপানা মানে উ-জু-রি যানা;

 

আঙুচ্চ্যে রেদোত্ একজনরে এম্বেদান বাচ্চ্যে থানার পর

নরম হিয়ের দরজা খুয়েনেই এরাসাচ্‌ গোজেই দেনা,

তারপর উ-জু-রি যানা—

যে পায় তে-উ ঠিক বুঝি পারে অজগর সাপে কেনে আডার ধরে;

বুক ফুল্ল্যে তুগনোত উদিনেই পুল্লে তে গারেই দে কোচপানার শিঙোর,

এ হিয়েয়ান ইক্‌কে তার; মুরো-কলগ-জুরির চিবাচিপ্প্যে পধে

পিয়্যে তে ভোগগুরিবার অমহদ অধিকার।

 

কোন এক আবাদা রেদোত্‌ রাজায় রাজায় লাড়েই বাজানার পর

যেক্কে বলপরে, একজন একবার বলজোর গরে

নিজর কোচপানার মানুজরে; তারপর শুরু হয় ইদানিং কোচ্‌পানা-

কোচপানার অভিনয়গুরি একজন’ হিয়েত উম তোগানার পর

ঘুম ন-এযে যেক্কে, দেঝেদেঝে নামি এযে পরপাগল্ল্যে ঝড়—

কোচপানা মানে মরদর মিলে হিয়ে চাগে চানার পর

দচ্চ্যো বাজি ইজ্ঞু লনার আওচ্‌

মিলের জ্বিলত্‌ চুয়োত চুয়োত রেদ আলে জানা পর

একদিন উজুরি যানা—

তারপর বেক্কানি পুরি ফেলেনেই পুরনো ফেজা উল্লানা

আরো নুও গুরি আঙুচ্চ্যে রেদোত এম্বেদান আজায় আজায় বাচ্চ্যে থানা,

নরম হিয়ের দরজা খুয়েনেই এরাসাচ গোজেই দেনা—

 

কোচপানা মানে আগাজর বুগ ভরন কালা তারা গুনানার পর

মিধে-মিধে গুরি মিঝে কধা শুনি যানা—

মিঝে মিঝে জুনোপহরত্‌-জুমঘরত তুদত-বুগত-তলপেদত

চুমোচুমি গরানা—

তারপর উজুরি যানা,

লোবিয়ত গুরি হানক্কন হরত পুরি থানার পর যে যার ঘরত

ফিরি যানা—

 

ইদানিং কোচপানার অমহদ ঝড়ে বেসদর লাগে আমনর

নাগরীরে, বঝর বঝর লিভ-টুগেদার গরানার পর

কোচপানার বুগ বিজেরে চেলে কোচপানা ভিলে কোচ্‌পানা নয়

পজিম’ বুয়ের আলে পুজ্জে কোচপানা আমনর;

পুটপুট্টে ইদানিং কোচ্‌পানার বেগেইয়্যে মডার্ণ-

নেক নয় মোক নয়, আজা-আচ্চ্যে রয়

বিচ্চ্যোন নিত্য চদর-ভদর;

জ্বলি যায় চম্পকনগর, জ্বলি যায় সিজারর কোচপানার ট্রয়।

 

৩০/১০/১৩

 

দঘিনোর বিজোনে দুলিবং দি’জনে

 

মাদি ফুরি উদিনেই ওই ন-পারং গাজ

ন-পারং কোই মন কধা মনরে

 

কোচপেনেই দি ন-পারং পরান পরানরে

থুরি ন-পারং চৈত মাস’ রোদ

ভাবি ন-পারং তরে, ত’ দুক্কে ভাবি ন-পারং আমনরে

 

আদিক্কে রেদোত ইদোত্‌ উদি ভিদিরে গুদিত্‌ তুই এবে

কোনদিন ভাবি ন-পারং

এক সাগর কোচপানা দেনা পর

একবুক আজা ভাঙি এক রেদ সুঘ লবে।

 

জুনান উদিলে ডাগচ : আয় আয় আয়

বুঝি পারং মুই, তুইও আগচ গাইগাই!

 

হয়তো এ’জনম নয়, আরেক জনমত

গাজ’ অনেই জাগি উদিম ফুল হাদত

ভুল’ অনেই ধরা দিম লাঙনীর ফাঁদত

পূর্ণিমা রেদোত্‌ কোচপানার মাধত গুদু হারা দি’ জনে

দুলিব’ ত’ মনান ম’ মনান’ লঘে দঘিনোর বিজোনে।

 

২৫/১০/১৩

জুম্লল্যান্ড ইন্টারন্যাশনাল ইউনিভার্সিটির গ্রাজুয়েটদের উদ্দেশ্যে

 

পাজ বঝর পর মরি যেম

দশ বঝর পর গ্রন্থ ছাবেম

তারপর রিনিচেম; চাঙমা সাহিত্য হুদ্দুর উজেল…

ইয়্যান যদি অয় আমা চাঙ্‌মা সাহিত্য চর্চার বাস্তবতা

সালে তুমি এক্কাগুরি শুন্নো ম-কধা-

জেদা শিবচরণ আর কোন দিন জন্ম ন-লব তমা দেঝত;

যে দেঝ জেদা মানুচ ন-চিনে

মরারে পূজে বানেনেই দেবেদা

সে দেঝর ঘিনে জেদা মানুচ্চুন ওই আগন চেবেদা।

 

এ মাদিত্‌ টিয়েনেই মুই কোই যাঙঅর

পাজ বঝর পর এ দেঝত্‌ কী এব

দশ বঝর পর সিয়্যান মাদেনেই কী চেদলের তর অব?

 

সাহিত্য বানা বিজগ’ পাদাত্‌ মাদেলে,

আওজ’ বাপ্পুরে গরম পানিত্‌ গাদেলে

দাদ ভেঙেদে আহ্‌জিবো বানা—পরে

ত পো-বু ত’ ইন্দি-ই ঘাজিবো বানা—

 

ধাগ’ কধায় আঘে-

“ঝুল থেক্কে ঘাদ, সময় থেক্কে আহ্‌দ”

 

বুঝি থেলে ম কধায়ান এক্কাগুরি মাদ।

 

২৯/১০/১৩

 

এত্তমান মরি যিয়্যেয় ইদোত ন-উদের তরে

 

তুই আমা ইদু নেই, তর কোন কধা আর ইদোত ন-উদে!

 

নিত্য যে বেলান উদিদ তরে দেঘি,  ফুদি উদিদ মোন ফুল

ন-উদোন ফুদি; ভাগ্য দেঝত্‌ উড়ি যায় ইরি দে মিলের চুল,

শুরু অয় দুরগুদি।

এত্তমান মরি যিয়্যেই আমি! ঘরে ঘরে মরা লাঝ কানি উদিলেও

ন-শুনি ন-বুঝি; সিমে গাজত্‌ মনা খার্‌খাজ্জে র’-য় বুক ফাদিলেও

ঝুবো সেরে মুরগুজি!

 

চোঘ’ পানি শুগে যানার পর, আমিও জান্নেই

কেনে এযে নুনজো পানি ঝর;

চেঙে-মেইনী-কাজলঙ পার অনেই

দেঘা নেই আদামানি আমনর

 

মনপোড়া, পেটপোড়া, ঘরপোড়া জাদ আমি; পুড়ি যার আমন’ মনানি,

তু-দ আমি গম আগি; বিন্ন্যে গরম চা বিল্ল্যে আওচগুরি চটপটি

রেদ বাড়িলে কয়েক্কান ব্রেকিং নিউস মাদেলে উম পেই

এই উমে ঘুম নেই, আরো কিচ্ছু তোগাই

লৌ-রঙে রাঙা অয় এহ্‌ল জুম পাদি

 

যে দেঝত্‌ ঘুম ন-এযে সে দেঝর মাঞ্জে আরো কিচ্ছু তোগান

আরো কয়েক্কান দোগান জাগি উধে গণ-আদামত

আরো কিজু বেজা-কেনা অয় বাজার’ লুকদি খলাত;

আরো কিজু মাঞ্জোর ভুক্‌মরে বিচ্চ্যোন’ চিবাপিপ্প্যে এরাদলাত্‌

 

তুই নেই, নেই তর কোন কধা ইদোত

তুই ছাড়াও আঘুর রেদোত আমার কোন দুঘ নেই

ভাবদে ভাবদে একদিন মুইও নেই!

 

বাজি আগ যারা তুমি,

এত্তমান কী মরি যিয়্যো যিদ্দুর মরিলে জেই উদি ন-পারে,

নিজ’ বাচ্‌ নিজরে চিনি ন-পারে,

এত্তমান মরি যিয়্যো তুমি!

 

২৮/১০/১৩

জুমদেঝ বাগানত

 

ভালকদিন আগে-

লৌ’ গাঙ’ লৌ ফুদি উত্তে মোন’ দেঝ’ মেঘ মায়

চেঙে গাঙ বেই যায় রাঙা বেল ছদকে

মাদি উত্তে একজন বুক ভরন বারুজে

জাগি উত্তন একতাল নিজর গরজে

 

মোক-পো ছাড়ি গডা ভাঙি একদিন

ছরা গঙ নামি এইচ্চে মোন-মুরো ফাড়ি

গাড়ি দেঝত। অজল তুগোন কানাত লোনেই

আজেরে পুজ্জে রাজপধ লাড়েইয়োত।

 

দি-তিন্নু জাদ কাবিদাঙর উচ্চ্যো উদিল যদবদে,

ওজোল ওজোল বোয়ে চেলাক অদিন্যে বিজোল পধে

বিজিদি যাদে যাদে দরগরে পারা

ঢালি গেলাক কানা হুমোত রাঙা পানি

হারি নে-যেলাক মা বুগর কজি এরাসাস

আওজর বোননুরে বানে গেলাক রানী।

 

আজার হাদে হাদে কোন এক বিজু রেদোত্‌

এ জাদ বুগত চুবিচুবি একঝাঁক ফুল ফুদোদন

পুত্তে বেল ছদক ফুদিবার আগে

কোন এক বিজু রেদোত্‌ একঝাঁক ভোমরা জাগি উদোদন

একতাল মানেইও লঘে।

এইচ্চ্যে তুমি বেক্কুনে যুগোল-

জুমদেঝ বাগানত একজন ডাগানত

উজেই যেবা বেক্কুনে নিজর গরজে।

 

২৮/১০/১৩

চাক্‌মা ছোট কবিতা

 

[১]

লেঘা নেই দেঘা নেই হুদু যিয়্যে কবিতা !

 

বারিঝের ঝড়’ সান কানি-কানি মুই নেই

ফুল ওনেই ফুদি চা যদি থাচ কোচপেই

কোচপানা বাগানত মিধে মিধে ডাগানত

মুই থেলে তুই নেই তুই থেলে মুই!

 

[২]

ঘুম নেই জুম নেই আঙি যার বুক

থুম নেই থুম নেই

জাদ চিগোন মানেইয়োর দুঘ

 

ফিরি আয় আমা দেঝত-

চিদ দিঘোলী মাধ-ঘাট ভুই, গাজত-বাজত

ফিরি আয় তুই,

যদি তরে দেলে বুক ভরিব’ পেলে-পেলে

মুয়োত্‌ চিজির আজি ফুদি উদিব’ তুই ইদু এলে।

 

২৩/১০/১৩

 

About the author

হেগা

Permanent link to this article: http://chtbd.org/archives/2409

3 pings

মন্তব্য করুন

আপনার ই-মেইল এ্যাড্রেস প্রকাশিত হবে না। * চিহ্নিত বিষয়গুলো আবশ্যক।

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>